Ngjarja e rëndë u regjistrua në këtë pallat që shihni në Torremaggiore të Foggia-s, ku autori i identifikuar si Taulant Malaj nga Selenica e Vlorës vrau me thikë një shtetas italian, fqinjin e tij dhe vajzën e tij 16-vjeçare, si dhe plagosi lehtë bashkëshorten.

Referuar mediave italiane, pas ngjarjes së rëndë fshihen motivet e xhelozisë.

Gjithçka nisi mesnatën e së shtunës, ku sipas mediave italiane, 45-vjeçari ka kapur në shtëpinë e tij fqinjin italian Massimo De Santis, për të cilin dyshonte se kishte lidhje intime me bashkëshorten. Malaj është përleshur fizikisht me italianin e më sherri ka përfunduar duke e goditur me thikë në grykë, duke i shkaktuar vdekjen fqinjit.

Në çmenduri e sipër, ai ka goditur pa dashje vajzën e tij Jessica, që duket se po i dilte në mbrojtje nënës së saj. 16-vjeçarja ka humbur më pas jetën rrugës për në spital.

Taulant Malaj u arrestua vetëm disa minuta më pas, fare pranë pallatit ku u regjistrua ngjarja e rëndë. Mediat kanë publikuar edhe një video të regjistruar nga Malaj pasi kishte kryer aktin e rëndë. Në të ai thotë: “Quhem Taulant Malaj, nga Selenica e Vlorës. Shikoje, e kam therur vetë. Vetë e kam therur”./Tv Klan